ನ್ಯೂಜಿಲ್ಯಾಂಡ್ ಸಂಸದೆ ಜೂಲಿ ಅನ್ನೆ ಸಾಹಸ..
ನ್ಯೂಜಿಲೆಂಡ್ನ ಸಂಸದೆ ಜೂಲಿ ಅನ್ನೆ ಈ ಸಾಹಸ ಮಾಡಿದವರು. ಇವರು ರಾಜಕಾರಣಿಯಾಗುವುದಕ್ಕೂ ಮೊದಲು ಒಬ್ಬರು ಸೈಕ್ಲಿಸ್ಟ್. ಆದರೆ ತುಂಬು ಗರ್ಭ, ಆ ಹೆರಿಗೆ ನೋವಿನ ಮಧ್ಯೆ ಮಧ್ಯರಾತ್ರಿ 2 ಗಂಟೆ ಹೊತ್ತಿಗೆ ಸೈಕಲ್ ತುಳಿದುಕೊಂಡು ಬಂದು ಆಸ್ಪತ್ರೆ ಸೇರಿ ಒಂದೇ ತಾಸಿನಲ್ಲಿ ಮಗುವಿಗೆ ಜನ್ಮ ನೀಡಿದ್ದು ಇದೀಗ ಬಹುದೊಡ್ಡ ಸುದ್ದಿಯಾಗಿದೆ. ಒಂದು ಸುಂದರವಾದ, ಆರೋಗ್ಯಯುತವಾದ ಮಗುವಿಗೆ ಜನ್ಮ ನೀಡಿದ್ದಾರೆ. ಅದಾದ ಬಳಿಕ ಈ ಬಗ್ಗೆ ಫೇಸ್ಬುಕ್ನಲ್ಲಿ ಪೋಸ್ಟ್ ಹಾಕಿದ್ದಾರೆ. ಈಕೆಯ ಕೆಲಸಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ಮಿಶ್ರ ಬೆಂಬಲ ವ್ಯಕ್ತವಾಗಿದೆ. ಈ ರೀತಿಯ ಮಹಾತಾಯಿಯನ್ನು ನಾನು ನೋಡೇ ಇಲ್ಲ ಅಂತ ಒಬ್ಬರು ಕಮೆಂಟ್ ಮಾಡಿದ್ದಾರೆ.
ಹೆರಿಗೆಯಾದ ಬಳಿಕ ಫೋಟೋಗಳನ್ನು ಶೇರ್ ಮಾಡಿಕೊಂಡಿರುವ ಅನ್ನೆ, ಬಿಗ್ ನ್ಯೂಸ್ ! ಇಂದು ಮುಂಜಾನೆ 3.04ಗಂಟೆ ಹೊತ್ತಿಗೆ ನಮ್ಮ ಕುಟುಂಬಕ್ಕೆ ಹೊಸ ಸದಸ್ಯರೊಬ್ಬರ ಎಂಟ್ರಿಯಾಗಿದ್ದಾರೆ. ಈ ಸಲ ಹೆರಿಗೆಗೆ ಸೈಕಲ್ ತುಳಿದು ಕೊಂಡು ಹೋಗಿ ಅಡ್ಮಿಟ್ ಆಗುವ ಯೋಜನೆ ಇರಲಿಲ್ಲ. ಆದರೆ ಕೊನೆಯಲ್ಲಿ ಹಾಗೆಯೇ ಬರುವಂತಾಯ್ತು ಎಂದಿದ್ದಾರೆ. ಹಾಗೇ, ನನಗೆ 2 ಗಂಟೆ ಹೊತ್ತಿಗೆ ಹೆರಿಗೆ ನೋವು ಬರಲು ಶುರುವಾಯಿತು. ಆದರೆ ಅದು ತೀವ್ರವಾಗಿ ಇರಲಿಲ್ಲ. 2-3 ನಿಮಿಷಕ್ಕೊಮ್ಮೆ ಬಿಟ್ಟುಬಿಟ್ಟು ಬರುತ್ತಿತ್ತು. ಆದರೆ ಆಸ್ಪತ್ರೆಗೆ ಹೋಗುವಷ್ಟರಲ್ಲಿ ತೀವ್ರವಾಯಿತು. ನಾನು ಆಸ್ಪತ್ರೆ ಸೇರಿದ ಬಳಿಕ ನನಗೆ ಹೆರಿಗೆ ನೋವು ತೀವ್ರವಾಗಿ ಕಾಣಿಸಿಕೊಳ್ತು. ಒಂದು ತಾಸಿನ ಬಳಿಕ ಮಗು ಹುಟ್ಟಿದೆ ಎಂದು ಹೇಳಿಕೊಂಡಿದ್ದಾರೆ.
ಮೊದಲ ಹೆರಿಗೆಗೂ ಹೀಗೆ ಮಾಡಿದ್ದ ಸಂಸದೆ!
ಈ ಸಂಸದೆ ಹೀಗೆ ಸೈಕಲ್ ಹೊಡೆದುಕೊಂಡು ಹೋಗಿ ಹೆರಿಗೆಗೆ ಅಡ್ಮಿಟ್ ಆಗಿದ್ದು ಇದೇ ಮೊದಲಲ್ಲ. 2018ರಲ್ಲಿ ಇವರು ತಮ್ಮ ಮೊದಲ ಮಗನಿಗೆ ಜನ್ಮ ನೀಡುವಾಗಲೂ ಸೈಕಲ್ ತುಳಿದುಕೊಂಡು ಹೋಗಿಯೇ ಆಕ್ಲೆಂಡ್ ನಗರದ ಆಸ್ಪತ್ರೆಯೊಂದಕ್ಕೆ ದಾಖಲಾಗಿದ್ದರು. ಆಗ ಈ ವಿಚಾರ ಕೂಡ ಸಖತ್ ವೈರಲ್ ಆಗಿತ್ತು. ಇದೀಗ ಮತ್ತೆ ಎರಡನೇ ಬಾರಿ ಈ ಸಾಹಸ ಮಾಡಿದ್ದಾರೆ. ಇನ್ನೂ ನೆಟ್ಟಿಗರು ಇವರ ಕೆಲಸಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ತಾಯಿ ಮಗುವಿಗೆ ಶುಭ ಹಾರೈಸುತ್ತಿದ್ದಾರೆ.
