ಖರ್ಗೆ ಅಧ್ಯಕ್ಷರಾಗಿರುವುದರಿಂದ ರಾಜ್ಯ ಕಾಂಗ್ರೆಸ್‌ಗೆ ಲಾಭ ಇಲ್ಲ: ಜಗದೀಶ್‌ ಶೆಟ್ಟರ್‌
ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ಮಲ್ಲಿಕಾರ್ಜುನ ಖರ್ಗೆ ರಾಜ್ಯದವರೇ. ಅವರು ಎಐಸಿಸಿ ಅಧ್ಯಕ್ಷರಾಗಿದ್ದಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ. ಆದರೆ ರಾಜಕೀಯವಾಗಿ ಕರ್ನಾಟಕ ಕಾಂಗ್ರೆಸ್‌ಗೆ ಲಾಭವಾಗುವುದಿಲ್ಲ’ ಎಂದರು. ‘ಈಗಾಗಲೇ ಜನರು ಮಾತಾಡುವ ಹಾಗೇ ಕಾಂಗ್ರೆಸ್‌ನಲ್ಲಿ ಡಿ.ಕೆ.ಶಿವಕುಮಾರ್‌, ಸಿದ್ದರಾಮಯ್ಯ ಅವರ ಗುಂಪುಗಳಿವೆ. ಇದೀಗ ಮಲ್ಲಿಕಾರ್ಜುನ ಖರ್ಗೆ ಅವರು ರಾಷ್ಟ್ರೀಯ ಅಧ್ಯಕ್ಷರಾಗಿರುವುದರಿಂದ ಮೂರನೇ ಗುಂಪು ಸೃಷ್ಟಿಯಾಗಲಿದೆ. ರಾಜಸ್ಥಾನ ಚುನಾವಣೆ ಸವಾಲು ಮುಂದಿದೆ. ಆ ಚುನಾವಣೆ ಸೋಲುವ ಮೂಲಕ ಕಾಂಗ್ರೆಸ್‌ ಅಧೋಗತಿಗೆ ಹೋಗಲಿದೆ’ಎಂದು ಹೇಳಿದರು.
ಹಲಾಲ್‌ ಹೆಸರಲ್ಲಿ ರಾಜಕಾರಣವಿಲ್ಲ
‘ಹಲಾಲ್‌ ಹೆಸರಲ್ಲಿ ರಾಜಕಾರಣ ಮಾಡುವ ಪ್ರಶ್ನೆ ಇಲ್ಲ. ಹಲವು ಸಂಘಟನೆಗಳು, ಕೆಲ ವ್ಯಕ್ತಿಗಳು ಅದರ ಬಗ್ಗೆ ಮಾತನಾಡುತ್ತಿದ್ದಾರೆ. ಹೀಗಾಗಿ ಅದರ ಬಗ್ಗೆ ನಮಗೆ ಹೇಳುವ ಅವಶ್ಯಕತೆ ಜಮೀರ್‌ ಅಹ್ಮದ್‌ ಅವರಿಗೆ ಇಲ್ಲ’ ಎಂದು ತಿರುಗೇಟು ನೀಡಿದರು.
ಕಾಂಗ್ರೆಸ್‌ ಉದ್ಧಾರ ಆಗೋದಿಲ್ಲ
‘ರಾಹುಲ್‌ ಗಾಂಧಿ ಎಲ್ಲಿಯವರೆಗೆ ಕಾಂಗ್ರೆಸ್‌ ನಾಯಕರಾಗಿರುತ್ತಾರೆ ಅಲ್ಲಿಯವರೆಗೆ ಕಾಂಗ್ರೆಸ್‌ ಉದ್ಧಾರ ಆಗುವುದಿಲ್ಲ. ಅವರು ಸಾವಿರಾರು ಕಿ.ಮೀ. ಪಾದಯಾತ್ರೆ ಮಾಡಲಿ, ಮತ್ತೊಂದು ಮಾಡಲಿ. ಐಸಿಯುದಲ್ಲಿರುವ ಕಾಂಗ್ರೆಸ್‌ಗೆ ಆಕ್ಸಿಜನ್‌ ಕೊಡಲು ರಾಹುಲ್‌ ಗಾಂಧಿ ಭಾರತ ಜೋಡೋ ಅಂತಹ ಚಟುವಟಿಕೆ ಮಾಡುತ್ತಿದ್ದಾರೆ’ ಎಂದು ಟೀಕಿಸಿದರು.
‘ಹೆಚ್‌.ಡಿ.ಕುಮಾರಸ್ವಾಮಿ ಅವರಿಗೆ 49 ಸೀಟು ಬರುತ್ತವೆಯೇ ಎಂಬುದೇ ಅನುಮಾನ. ಹೀಗಾಗಿ ಅವರು ಮತ್ತೆ ಸಿಎಂ ಆಗುವ ಹೇಳಿಕೆಗೆ ಅರ್ಥವೇ ಇಲ್ಲ’ ಎಂದು ಕುಟುಕಿದರು.
