ಟ್ರಂಪ್ ತೆರಿಗೆ ಎಫೆಕ್ಟ್ ನಿಂದ ಜಗತ್ತಿನ ಮಾರುಕಟ್ಟೆ ಕುಸಿದಿದ್ದೇಕೆ?

ನವದೆಹಲಿ: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರತೀಕಾರದ ತೆರಿಗೆ ಪದ್ಧತಿಯಿಂದ ಇಡೀ ಜಗತ್ತು ನರಳಾಡುವಂತಾಗಿದೆ. ಜಗತ್ತಿನ ನಾನಾ ಷೇರುಪೇಟೆಗಳು ಅಕ್ಷರಶಃ ನೆಲಕಚ್ಚಿವೆ. ಸಾವಿರಾರು ಕಂಪನಿಗಳು ದೊಡ್ಡಮಟ್ಟದಲ್ಲಿ ನಷ್ಟ ಅನುಭವಿಸಿದೆ. ಲೆಕ್ಕವಿಲ್ಲದಷ್ಟು ಹೂಡಿಕೆದಾರರು ಏಕಾಏಕಿ ಬಡವರಾಗಿದ್ದಾರೆ. ಭಾರತದಲ್ಲಂತೂ ಕೇವಲ ಹತ್ತೇ ಹತ್ತು ಸೆಕೆಂಡ್ ಗಳಲ್ಲಿ ಸುಮಾರು 20 ಲಕ್ಷ ಕೋಟಿ ರೂ.ಗಳಷ್ಟು ನಷ್ಟವಾಗಿದೆ.

ಒಂದು ವಿಷಯವನ್ನು ನಾವು ತಿಳಿದುಕೊಳ್ಳಲೇಬೇಕು. ಅದೇನೆಂದರೆ, ಇಂದಿನ ಜಾಗತಿಕ ಮಾರುಕಟ್ಟೆ 1991ರ ವಿಶ್ವ ವಾಣಿಜ್ಯ ಒಪ್ಪಂದಗಳ ನಂತರ ಬೆಳೆದು ನಿಂತ ಮಾರುಕಟ್ಟೆ, ಇಂದು ಇಂಟರ್ ಡಿಪೆಂಡೆಂಟ್ ಮಾರ್ಕಟ್. ಒಬ್ಬರನ್ನೊಬ್ಬರ ಕೈ ಹಿಡಿದುಕೊಂಡು ಜೊತೆಯಲ್ಲೇ ಸಾಗುತ್ತಿದ್ದೇವೆ ಎಂದಿಟ್ಟಕೊಳ್ಳೋಣ. ಆ ಕೈಗಳು ಬಿಡಿಸಿಕೊಳ್ಳಲಾಗದಂತೆ ಲಾಕ್ ಆಗಿವೆ. ಅಂಥ ಸಂದರ್ಭದಲ್ಲಿ ಎಲ್ಲಾದರೂ ಒಬ್ಬ ಎಡವಿದರೆ ಎಲ್ಲರೂ ಬೀಳುತ್ತಾರೆ. ಇಲ್ಲಿ ಹೇಳಿರುವ ಉದಾಹರಣೆ ಕೇವಲ ಮೇಲ್ನೋಟಕ್ಕೆ ಇವತ್ತಿನ ಜಾಗತಿಕ ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳುವ ಬಗ್ಗೆ ಅಷ್ಟೆ. ಆದರೆ, ಇದಕ್ಕಿಂತ ಹೆಚ್ಚು ಸಂಕೀರ್ಣವಾಗಿ ಜಗತ್ತಿನ ನಾನಾ ದೇಶದ ಮಾರುಕಟ್ಟೆಗಳು ಒಂದನ್ನೊಂದು ಬೆಸೆದುಕೊಂಡಿವೆ. ಹೂಡಿಕೆಗಳು ಅಲ್ಲಿಂದಿಲ್ಲಿಗೆ, ಇಲ್ಲಿಂದ ಅಲ್ಲಿಗೆ ಬಿಲಿಯನ್ ಗಟ್ಟಲೆ ಆಗಿವೆ.

ಇಂದು, ಷೇರು ಮಾರುಕಟ್ಟೆಯ ದುಃಸ್ಥಿತಿಗೆ ಕಾರಣವಾಗಿದ್ದು ಟ್ರಂಪ್ ಆರಂಭಿಸಿರುವ ಟ್ರೇಡ್ ವಾರ್. ಜಗತ್ತಿನ ನಾನಾ ದೇಶಗಳಲ್ಲಿ ಅಮೆರಿಕದ ಸರಕುಗಳ ಮೇಲೆ ವಿಧಿಸಲಾಗುವ ಸಂಕಕ್ಕೆ ಪ್ರತಿಯಾಗಿ ಆಯಾ ದೇಶಗಳ ಸರಕುಗಳು ಅಮೆರಿಕ ಪ್ರವೇಶಿಸುವಾಗ ಹೇರಳವಾಗಿ ಸುಂಕ ಹಾಕುವಂಥ ನಿರ್ಧಾರವನ್ನು ಟ್ರಂಪ್ ಕೈಗೊಂಡರು. ಅದನ್ನು ರೆಸೆಪ್ರೋಕಲ್ ಟಾರಿಫ್ ಎಂದು ಕರೆದರು ಹಾಗೂ ಅದನ್ನು ಇತ್ತೀಚೆಗೆ ಏ. 2ರಿಂದ ಜಾರಿಗೊಳಿಸಿದರು.

ಅವರ ಈ ನಿರ್ಧಾರ ನಿಜಕ್ಕೂ ದೊಡ್ಡ ಮಟ್ಟಕ್ಕ ಎಫೆಕ್ಟ್ ಆಗಿರುವುದು ಜಾಗತಿಕ ಸಪ್ಲೈ ಚೈನ್ ಮೇಲೆ. ಹೌದು. ಇಂದಿನ ನವಯುಗದ ಉದ್ಯಮಗಳು ನಿಂತಿರುವುದೇ ಈ ಸಪ್ಲೈ ಚೈನ್ ಮೇಲೆ. ಅಷ್ಟಕ್ಕೂ ಈ ಸಪ್ಲೈ ಚೈನ್ ಎಂದರೇನು? ಒಂದು ಪ್ರಾಡಕ್ಟ್ ತಯಾರು ಮಾಡುವ ಕಂಪನಿ, ಅದು ಭಾರತದ್ದೇ ಆಗಿರಲಿ, ಅಮೆರಿಕದ್ದೇ ಆಗಿರಲಿ, ಅಥವಾ ಇನ್ಯಾವುದೇ ರಾಷ್ಟ್ರದ್ದೇ ಆಗಿರಲಿ. ಅದು ಗ್ಲೋಬಲ್ ಸ್ಟ್ಯಾಂಡರ್ಡ್ ಮಟ್ಟದಲ್ಲಿ ಇರಬೇಕಾದರೆ ಅದನ್ನು ತಯಾರಿಸುವ ಕಂಪನಿ ನಾನಾ ವಿದೇಶಿ ಕಂಪನಿಗಳ ಜೊತೆಗೆ ಕೈ ಜೋಡಿಸಲೇಬೇಕು.

ಭಾರತದಲ್ಲಿ ಮೊಬೈಲ್ ತಯಾರಿಕಾ ಕಂಪನಿಯೊಂದು ಇದೆ ಎಂದಿಟ್ಟುಕೊಳ್ಳೋಣ. ಅದು ಮದರ್ ಬೋರ್ಡ್ ಗಾಗಿ ಚೀನಾದ ಕಂಪನಿಗಳ ಜೊತೆಗೆ ಕೈ ಜೋಡಿಸಬೇಕು. ಜಗತ್ತಿನ ಅತ್ಯಾಧುನಿಕ ಪ್ರಾಸೆಸರ್ ಬೇಕು ಎಂದಾದರೆ ಅದು ಅಮೆರಿಕದ ಕಂಪನಿ ಜೊತೆಗೆ ಕೈ ಜೋಡಿಸಬೇಕು. ಲೀಥಿಯಂ ಅಯಾನ್ ಬ್ಯಾಟರಿಗಾಗಿ ಮತ್ತೆ ಚೀನಾದ ಕಂಪನಿಗಳ ಜೊತೆಗೆ ಕೈ ಜೋಡಿಸಬೇಕು. ಮೊಬೈಲಿಗೆ ನೀವು ಅಳವಡಿಸುವ ಎಲ್ ಇಡಿ ಡಿಸ್ ಪ್ಲೇ ಚೀನಾದಿಂದ ಬರಬೇಕು. ಮೊಬೈಲ್ ಕೆಳಗೆ ಬಿದ್ದರೂ ಅದು ಒಡೆದು ಹೋಗದಂತೆ ತಡೆಯಲು ಸ್ಕ್ರೀನ್ ಮೇಲೆ ಅಳವಡಿಸುವ ಗೊರಿಲ್ಲಾ ಗ್ಲಾಸ್ ಗಾಗಿ ಅಮೆರಿಕದ ಕಂಪನಿ ಜೊತೆಗೆ ಟೈ-ಅಪ್ ಆಗಬೇಕು. ಹೀಗೆ… ನಾನಾ ದೇಶಗಳ ಕಂಪನಿಗಳ ಸಾಧನಗಳನ್ನು ಬಳಸಿಕೊಂಡೇ ನಾವು ಮೊಬೈಲ್ ಹೊರತರಲು ಸಾಧ್ಯ.

ಇದು ಕೇವಲ ಮೊಬೈಲ್ ಮಾತ್ರವಲ್ಲ, ನಾವು – ನೀವು ಬಳಸುವ ಎಲ್ಲಾ ಬ್ರಾಂಡೆಡ್ ವಸ್ತುಗಳೂ ಹೀಗೆ ಜಗತ್ತಿನ ನಾನಾ ದೇಶಗಳ ಕಚ್ಚಾ ವಸ್ತುಗಳ ಮೇಲೆ ಅಲವಂಬಿತವಾಗಿರುತ್ತವೆ. ಈಗ, ಅಂಥ ವಸ್ತುಗಳ ಮೇಲೆ ತೆರಿಗೆ ಜಾಸ್ತಿ ಜಡಿದರೆ ಆ ಸಪ್ಲೈ ಚೈನ್ ಕುಂಠಿತವಾಗುತ್ತದೆ. ಕಂಪನಿಗಳಿಗೆ ಸಾವಿರಾರು ಕೋಟಿ ರೂ. ನಷ್ಟವಾಗುತ್ತದೆ.

ಅಮೆರಿಕವು ಭಾರತದ ಮೇಲೆ ಶೇ. 26ರಷ್ಟು ಪ್ರತೀಕಾರದ ತೆರಿಗೆ ಹಾಕಿದೆ. ಅದರ ಜೊತೆಗೆ, ಶೇ. 20ರಷ್ಟು ಮೂಲ ತೆರಿಗೆ ಮುಂದುವರಿಸಲಾಗಿದೆ. ಅಲ್ಲಿಗೆ, ಭಾರತದಿಂದ ಅಮೆರಿಕಕ್ಕೆ ಹೋಗುವಂಥ ಸಾಮಗ್ರಿಗಳ ಮೇಲೆ ಶೇ. 46ರಷ್ಟು ತೆರಿಗೆ ಬೀಳುತ್ತದೆ. ಇದರಿಂದಾಗಿ, ಅಮೆರಿಕದಲ್ಲಿರುವ ಕಂಪನಿಯೊಂದು ಭಾರತದಿಂದ ತರಿಸುವ ಯಾವುದೇ ವಸ್ತುಗಳನ್ನು ಪಡೆಯಲು ನಿರಾಕರಿಸುತ್ತಾನೆ.ಭಾರತದಲ್ಲಿ ಮೇಕ್ ಇನ್ ಇಂಡಿಯಾ ವ್ಯವಸ್ಥೆ ಜಾರಿಯಾದ ನಂತರ, ಅಮೆರಿಕ ಸೇರಿದಂತೆ ನಾನಾ ದೇಶಗಳ ವಸ್ತುಗಳು ಇಲ್ಲಿ ಭಾರತದಲ್ಲೇ ಉತ್ಪಾದನೆಯಾಗುತ್ತಿವೆ. ಅರ್ಥಾತ್… ಆಯಾ ದೇಶಗಳ ಕಂಪನಿಗಳು ಭಾರತದಲ್ಲೇ ತಮ್ಮ ಉತ್ಪಾದನಾ ಘಟಕಗಳನ್ನು ಅಲ್ಲಿ ಬಿಡಿಭಾಗಗಳನ್ನು ತಯಾರಿಸುತ್ತಿವೆ. ಇಲ್ಲಿ ತಯಾರಿಸಲಾದ ಬಿಡಿಭಾಗಗಳನ್ನೇ ಪುನಃ ತಮ್ಮ ದೇಶಕ್ಕೆ ತರಿಸಿಕೊಂಡು ಅಲ್ಲಿ ಅಂತಿಮ ಉತ್ಪನ್ನವನ್ನು ತಯಾರು ಮಾಡಿ ಜಾಗತಿಕ ಮಟ್ಟದಲ್ಲಿ ರಿಲೀಸ್ ಮಾಡುತ್ತವೆ. ಇದಕ್ಕೆ ಸೂಕ್ತ ಉದಾಹರಣೆ, ಆ್ಯಪಲ್ ಕಂಪನಿ.

ಆ ಕಂಪನಿಯು ಬೆಂಗಳೂರಿನಲ್ಲಿ ತನ್ನ ಬಿಡಿಭಾಗಗಳ ತಯಾರಿಕೆಯನ್ನು ಮಾಡುತ್ತಿದೆ. ಇಲ್ಲಿಂದ ಅಸೆಂಬಲ್ ಆದ ಬಿಡಿಭಾಗಗಳು ಮತ್ತೆ ಅಮೆರಿಕದ ಆ್ಯಪಲ್ ಕಂಪನಿಗೆ ಹೋಗುತ್ತವೆ. ಅಲ್ಲಿ ಅಂತಿಮ ಉತ್ಪನ್ನ ತಯಾರಾಗಿ ಜಾಗತಿಕ ಮಟ್ಟದಲ್ಲಿ ಆ್ಯಪಲ್ ಫೋನ್ ಗಳು ಬಿಡುಗಡೆಯಾಗುತ್ತವೆ. ಈಗ ಟ್ರಂಪ್ ಅವರ ಪ್ರತೀಕಾರದ ತೆರಿಗೆ ಪದ್ಧತಿ ಜಾರಿಗೆ ಬಂದ ನಂತರ, ಭಾರತದಿಂದ ಬರುವ ವಸ್ತುಗಳ ಮೇಲೆ ಶೇ. 46ರಷ್ಟು ಸುಂಕ ಬೀಳುತ್ತದೆ. ಇದು ನಿಜಕ್ಕೂ ಹೊಡೆತ. ಆಗ, ಆ್ಯಪಲ್ ಕಂಪನಿಗೂ ನಷ್ಟವಾಗುತ್ತದೆ. ಆ್ಯಪಲ್ ಕಂಪನಿಯ ಉತ್ಪನ್ನಗಳಾದ ಐಫೋನ್, ಐಪ್ಯಾಡ್, ಮ್ಯಾಕ್ ಬುಕ್ ಗಳ ಬಿಡಿಭಾಗಗಳು ಭಾರತ ಮಾತ್ರವಲ್ಲದೆ, ವಿಯೆಟ್ನಾಂ, ಮಲೇಷ್ಯಾ, ಥಾಯ್ಲೆಂಡ್, ಐರ್ಲೆಂಡ್ ಗಳಲ್ಲೂ ತಯಾರಾಗುತ್ತವೆ. ಅವೆಲ್ಲವುಗಳ ಬಿಡಿಭಾಗಗಳು ಅಮೆರಿಕಕ್ಕೆ ಬಂದಾಗ ಅಲ್ಲಿ ಭಾರೀ ತೆರಿಗೆ ಕೊಡಬೇಕಾಗುತ್ತದೆ. ಆಗ, ಆ್ಯಪಲ್ ಫೋನ್ ಗಳ ಬೆಲೆ ಯದ್ವಾತದ್ವಾ ಏರಿಕೆಯಾಗುತ್ತದೆ.ಕಡಿಮೆ ದರದಲ್ಲಿ ಕೆಲಸ ಆಗುತ್ತೆ ಅಂತ ಭಾರತ ಹಾಗೂ ಇನ್ನಿತರ ದೇಶಗಳಲ್ಲಿ ತನ್ನ ಬಿಡಿಭಾಗಗಳ ತಯಾರಿಕೆ ಹಾಗೂ ಅಸೆಂಬ್ಲಿಂಗ್ ಘಟಕವನ್ನು ಅದು ಹಠಾತ್ತಾಗಿ ನಿಲ್ಲಿಸಿ, ತೆರಿಗೆ ಹಣ ಉಳಿಸಿಕೊಳ್ಳಲು ಅಮೆರಿಕದಲ್ಲೇ ಬಿಡಿಭಾಗಗಳ ಹಾಗೂ ಅಸೆಂಬ್ಲಿಂಗ್ ಘಟಕ ಸ್ಥಾಪಿಸುತ್ತದೆ ಆ್ಯಪಲ್ ಕಂಪನಿ. ಕೇವಲ ಆ್ಯಪಲ್ ಮಾತ್ರವಲ್ಲ, ಇಂಥ ಘಟಕಗಳ ನಿರ್ಮಾಣಕ್ಕಾಗಿ ಯಾವ್ಯಾವ ಕಂಪನಿಗಳು ಬಂಡವಾಳ ಹಾಕಿರುತ್ತವೋ ಅವೆಲ್ಲವೂ ತಮ್ಮ ಬಂಡವಾಳವನ್ನು ಹಿಂಪಡೆಯಲು ಆರಂಭಿಸುತ್ತವೆ. ಇದು ಆ್ಯಪಲ್ ಕಂಪನಿಗೂ ನಷ್ಟ, ಭಾರತ ಸೇರಿದಂತೆ ಎಲ್ಲೆಲ್ಲಿ ಆ್ಯಪಲ್ ಕಂಪನಿಯ ಅಸೆಂಬ್ಲಿಂಗ್ ಘಟಕಗಳಿವೆಯೋ ಅವುಗಳಿಗೆಲ್ಲಾ ನಷ್ಟ.

ಹೀಗೆ.. ಸಪ್ಲೈ ಚೈನ್ ಕುಸಿತದಿಂದ ಹಾಗೂ ಬಂಡವಾಳ ಹಿಂತೆಗೆತದಂಥ ಪ್ರಕ್ರಿಯೆಗಳು ಇಡೀ ಜಗತ್ತಿನಲ್ಲಿ ಶುರುವಾಗುತ್ತವೆ. ಆಗಲೇ ಇಡೀ ಜಾಗತಿಕ ಮಾರುಕಟ್ಟೆ ಕುಸಿಯಲಾರಂಭಿಸುತ್ತದೆ. ಆಗಲೇ ಹೇಳಲಾಗದಷ್ಟು ನಷ್ಟ ಉಂಟಾಗುತ್ತದೆ. ಇಲ್ಲಿ ಹೇಳಿರುವುದು ಜಾಗತಿಕ ಷೇರು ಮಾರುಕಟ್ಟೆ ಕುಸಿತಕ್ಕೆ ಕೇವಲ ಒಂದು ಮಜಲು ಅಷ್ಟೇ. ಸಪ್ಲೈ ಚೈನ್ ಕುಂಠಿತದಿಂದ ಕಂಪನಿಗಳ ವ್ಯವಹಾರ ನಿಂತು ಹೋಗುವುದು, ಅದರಿಂದ ಹೂಡಿಕೆಗಳ ಹಿಂಪಡೆಯುವಿಕೆ ಉಂಟಾಗುವುದು, ಷೇರುಗಳ ಮೌಲ್ಯ ಅಧಃಪತವಾಗುವುದು, ಅದರ ಪರಿಣಾಮದಿಂದ ಜಗತ್ತಿನಾದ್ಯಂತ ಸಾಮಗ್ರಿಗಳ ಬೆಲೆಯೇರಿಕೆ ಆತಂತ, ಜಗತ್ತಿನ ಎಲ್ಲಾ ಕಂಪನಿಗಳೂ ದಿವಾಳಿಯಾಗುವ ಭೀತಿ – ಇಂಥ ಸಾವಿರಾರು ಲೆಕ್ಕವಿಲ್ಲದಷ್ಟು ಕಾರಣಗಳು ಜಾಗತಿಕ ಷೇರು ಮಾರುಕಟ್ಟೆಯ ಕುಸಿತದ ಹಿಂದಿವೆ. ಆದರೆ, ಸಮಗ್ರವಾಗಿ ಹೇಳುವುದಾದರೆ ಟ್ರಂಪ್ ಅವರ ತೆರಿಗೆ ಪದ್ಧತಿಯೇ ಇಂದಿನ ಪರಿಸ್ಥಿತಿಗೆ ಮೂಲ ಕಾರಣ.

ಅಮೆರಿಕದ ಪ್ರಮುಖ ಷೇರು ಮಾರುಕಟ್ಟೆಗಳಾದ ಎಸ್ ಆ್ಯಂಡ್ ಪಿ 500, ಏ. 7ರಂದು ಶೇ. 5ರಷ್ಟು, ನ್ಯಾಸ್ ಡಾಕ್ ನಲ್ಲಿ ಶೇ. 5.7ರಷ್ಟು ಕುಸಿತವಾಗಿವೆ. ಅತ್ತ, ಡೌ ಜೋನ್ಸ್ ಮಾರುಕಟ್ಟೆಯೂ ತತ್ತರಿಸಿದೆ. ಐರೋಪ್ಯ ಷೇರು ಮಾರುಕಟ್ಟೆಯಲ್ಲೂ ಅಲ್ಲೋಲ ಕಲ್ಲೋಲವಾಗಿದ್ದು, ಸ್ಟಾಕ್ಸ್ ಷೇರು ಮಾರುಕಟ್ಟೆಯಲ್ಲಿ ಶೇ. 5.3ರಷ್ಟು,ಜರ್ಮನಿಯ ಡ್ಯಾಕ್ಸ್ ಮಾರುಕಟ್ಟೆಯಲ್ಲಿ ಶೇ. 9.4ರಷ್ಟು ಕುಸಿತವಾಗಿದೆ.

ಹಾಂಗ್ ಕಾಂಗ್‌ನಲ್ಲಿ ಹ್ಯಾಂಗ್‌ಸೆಂಗ್‌ ಷೇರು ಮಾರುಕಟ್ಟೆಯು ಶೇ. 11ರಷ್ಟು ಇಳಿಕೆ ಕಂಡರೆ, ಜಪಾನ್ ನ ರಾಜಧಾನಿಯಾದ ಟೋಕಿಯೊದ ನಿಕ್ಕಿ 225 ಸೂಚ್ಯಂಕ ಶೇ. 7ರಷ್ಟು ಇಳಿಕೆ ದಾಖಲಿಸಿತು.. ಶಾಂಘೈ ಕಾಂಪೊಸಿಟ್‌ ಶೇ. 6ಕ್ಕಿಂತ ಹೆಚ್ಚು ಕುಸಿತ ಕಂಡಿತು. ದಕ್ಷಿಣ ಕೊರಿಯಾದ ಕೋಪ್ಸಿ ,ೇರು ಮಾರುಕಟ್ಟೆ ಶೇ. 5ರಷ್ಟು ಇಳಿಕೆಯಾಗಿದೆ.

ಭಾರತೀಯ ಮಾರುಕಟ್ಟೆಯಲ್ಲಿ 4000 ಅಂಕಗಳಷ್ಟು ಕುಸಿತವಾಗಿದೆ. ದಿನದ ಆರಂಭದಲ್ಲೇ ಸೆನ್ಸೆಕ್ಸ್ ಷೇರುಗಳು ಸುಮಾರು 4,000 ಅಂಕಗಳಷ್ಟು ಕುಸಿತ ಕಂಡವು. ನಿಫ್ಟಿ 50ರಲ್ಲಿ ನೋಂದಾಯಿಸಲ್ಪಟ್ಟಿರುವ ಷೇರುಗಳು 21,750 ಪಾಯಿಂಟ್ ಗಳಿಗಿಂತ ಕೆಳಕ್ಕೆ ಕುಸಿಯಿತು. ಬಿಎಸ್ ಇ ಮಿಡ್ ಕ್ಯಾಪ್ ಹಾಗೂ ಸ್ಮಾಲ್ ಕ್ಯಾಪ್ ಷೇರುಗಳು ಶೇ. 10ರಷ್ಟು ಕುಸಿತ ಕಂಡವು.ಮಧ್ಯಾಹ್ನ 3 ಗಂಟೆ ಸುಮಾರಿಗೆ ಬಿಎಸ್ ಇಯಲ್ಲಿ ನೊಂದಾಯಿಸಲ್ಪಟ್ಟಿರುವ ಭಾರತದ ಅಗ್ರ 30 ಕಂಪನಿಗಳ ಷೇರುಗಳ ಸೂಚ್ಯಂಕವನ್ನು ನಿರ್ಧರಿಸುವ 3,000 ಪಾಯಿಂಟ್ಸ್ ಗಳಷ್ಟು ಇಳಿಕೆ ಕಂಡಿತು. ಜವಳಿ, ಇಂಜಿನಿಯರಿಂಗ್, ಇಲೆಕ್ಟ್ರಾನಿಕ್ಸ್ ಹಾಗೂ ಸಮುದ್ರ ಆಹಾರಗಳನ್ನು ರಫ್ತು ಮಾಡುವ ಕಂಪನಿಗಳು ತೀವ್ರವಾಗಿ ನಷ್ಟ ಅನುಭವಿಸಿವೆ. ಭಾರತದಲ್ಲೇ 20 ಲಕ್ಷ ಕೋಟಿ ರೂ.ಗಳಷ್ಟು ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ.

ಜಾಗತಿಕ ಮಾರುಕಟ್ಟೆಯಲ್ಲಿ ಹೀಗೆ ಸತತವಾಗಿ ಕಂಪನಿಗಳು ನಷ್ಟ ಅನುಭವಿಸುತ್ತಿದ್ದರೆ ಅದರ ಪರಿಣಾಮ ಎಲ್ಲಾ ದೇಶಗಳ ಮೇಲೆ ಆಗುತ್ತದೆ. ಕೊರೊನಾ ಟೈಮಿನಲ್ಲಿ ಜಗತ್ತಿನ ಹಲವಾರು ಕಂಪನಿಗಳು ನಷ್ಟವಾಗಿ ಬಾಗಿಲು ಎಳೆದುಕೊಂಡವು. ದೊಡ್ಡ ಕಂಪನಿಗಳು ನಷ್ಟ ಅನುಭವಿಸಿ ತಮ್ಮ ಕೆಲಸಗಾರರನ್ನು ಆಚೆ ಹಾಕಿದವು. ಹೀಗೆ.. ಉದ್ಯೋಗ ನಷ್ಟ, ವಸ್ತುಗಳ ಬೆಲೆ ಗಗನಕ್ಕೆ ಹೋಗುವುದು, ಪರಿಸ್ಥಿತಿ ಸರಿಹೋಗುವವರೆಗೂ ಎಲ್ಲೂ ಕೆಲಸ ಸಿಗದೇ ಇರುವುದು.. ಇಂಥ ದುಃಸ್ಥಿತಿಗಳನ್ನು ಜಗತ್ತು ಎದುರಿಸಬೇಕಾಯಿತು. ಅಂಥದ್ದೇ ಪರಿಸ್ಥಿತಿ ಈಗ ಮತ್ತೆ ಆವರಿಸುವ ಭೀತಿ ಎದುರಾಗಿದೆ. ಇದಲ್ಲದೆ, ಲಕ್ಷಾಂತರ ಜನರು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದ್ದು ಪರಿಸ್ಥಿತಿ ಹೀಗೇ ಮುಂದುರಿದರೆ ಅವರೆಲ್ಲರೂ ನಷ್ಟ ಅನುಭವಿಸುವಂತಾಗುತ್ತದೆ.ಟ್ರಂಪ್ ಅವರ ಹೊಸ ತೆರಿಗೆ ಪದ್ಧತಿಯು ಜಗತ್ತಿನ ಮಾರುಕಟ್ಟೆಯನ್ನು ದಿವಾಳಿಯತ್ತ ಕೊಂಡೊಯ್ಯುತ್ತದೆ ಎಂದು ತಜ್ಞರು ಮೊದಲೇ ಎಚ್ಚರಿಸಿದ್ದಾರೆ. ಅಂಥವರಲ್ಲಿ ಭಾರತದ ಆರ್ಥಿಕ ತಜ್ಞ ಸ್ವಾಮಿನಾಥನ್ ಕೂಡ ಒಬ್ಬರು. ಅವರೂ ಸಹ ಟ್ರಂಪ್ ಅವರ ಈ ತೆರಿಗೆ ಪದ್ಧತಿಯಿಂದ ಜಗತ್ತು ದಿವಾಳಿಯಾಗುತ್ತದೆ ಎಂದು ಹೇಳಿದ್ದಾರೆ. ಈಗಲೂ ಕಾಲ ಮಿಂಚಿಲ್ಲ. ಜಾಗತಿಕ ಆರ್ಥಿಕ ದಿವಾಳಿ ಆವರಿಸುವ ಮೊದಲೇ ಟ್ರಂಪ್ ಅವರು ತಮ್ಮ ತೆರಿಗೆ ಪದ್ಧತಿಯನ್ನು ಹಿಂಪಡೆದರೆ ಜಗತ್ತು ಉಳಿಯುತ್ತದೆ. ಆದರೆ, ಅವರು ಇಟ್ಟ ಹೆಜ್ಜೆ ಹಿಂದಿಡುವುದಿಲ್ಲ ಎಂದು ಹೇಳಿದ್ದಾರೆ. ಇಂಥ ಸಂದರ್ಭದಲ್ಲಿ ತಜ್ಞರು ಹೇಳುವುದೇನೆಂದರೆ, ಕಾದು ನೋಡುವ ತಂತ್ರ. ನಷ್ಟವು ಮಿತಿ ಮೀರಿ ಅದು ಅಮೆರಿಕಕ್ಕೂ ತಿರುಗುಬಾಣವಾಗಿ ಅಲ್ಲಿಯ ಆರ್ಥಿಕತೆಯ ಬುಡವೂ ಅಲುಗಾಡಲು ಆರಂಭವಾದಾಗ ಟ್ರಂಪ್ ಅವರಿಗೆ ತಾವೇನು ತಪ್ಪು ಮಾಡಿದ್ದೇವೆ ಎಂಬುದು ಅರಿವಿಗೆ ಬರುತ್ತದೆ. ಆಗ, ಅವರು ತೆರಿಗೆಯನ್ನು ಹಿಂಪಡೆಯಲು ಮನಸ್ಸು ಮಾಡಬಹುದು. ಅಲ್ಲಿಯವರೆಗೆ ಕಾಯಬೇಕಷ್ಟೇ ಎಂದು ಹೇಳಿದ್ದಾರೆ.